“بالعربى الكسيح”: “شعب مالوش حل” !

سردية تكتبها: ميرفت قاسم

المصرى لما يسأل  عن الحديدة اللي فوق سطح الهرم لازمتها أيه؟! نشوف الكومنتات اللي جاتله بصراحة تؤكد أن المصريين مش هيموتوا موته طبيعية.. مالهومش حل.

في اَراء بتقول إنه برج تقوية لشبكة محمول قديمة اسمها فوراعون

وفيه اَراء بتقول إنها شبكة وايرلس والباسورد بتاعتها مكتوب في ورقه تحت الهرم

وفي اَراء تانيه بتقول إنه خازوق الإله خوفو، وكان بيقعّد عليه المعارضين

وفي اَراء بتقول ان خوفو كان ناوي يعمل واحدة زيها فوق هرم خفرع علشان يعمله منشر غسيل لكليوباترا

وفي اَراء بتقول إنه كان طبق دش علشان الفراعنه كانت بتحب تتفرج على الاهلي و الزمالك

وفيه اَراء بتقول ده الحديد بتاع الدور التاني للهرم اللي كانوا ناويين يبنوه لكنهم مكملوش لما لقوا الحديد والاسمنت غلي

وفيه اَراء بتقول إنه الاستاند بتاع البندقية السنايبر اللي الفراعنه كانوا بيطخوا بعض بيه بالليل

وفيه اَراء بتقول مالوش لازمه بس خوفو حب يسيب التاتش بتاعه عادي.

بس بين كل الاَراء مفيش غير رأى صديقى الفيلسوف اللى قال إنها في الاغلب معموله علشان يعرفوا يشيلوا منها الهرم ويكنسوا و يمسحوا من تحته.