ميرفت قاسم تكتب « بالعربى الكسيح »: « فشخرة كذابة »
الفرح لازم يكون في فندق خمس نجوم ويحيي الفرح عمرو دياب وأليسا وحكيم وصافينار تيجي تزفهم..
بنتي مش قليلة عشان يتعملها فرح أقل من بنت خالتها، وبنت عمها، وبنات العيلة..
شهر العسل فى المالديف..
الشبكة مليون جنيه..
أقل حاجة الفستان من بره مصر..
ليه البعض بياخد الفلوس مقاس للغلاوة حتي فى أمثالنا الشعبية تلاقي المثل يقول “مالك مغليها قال دافع دم قلبى فيها”.
اكسروا القوالب الجامدة المتوارثة، عيشوا الحياة ببساطة، لو مفيش اتفاق بين الطرفين في الميول والاهتمامات ووجهات النظر، عمر حياتهم ما هتستمر وتنجح، هتبقي حياة كلها غم ونكد، وتنتهي بالانفصال.
وممكن نتيجتها تكون أطفال حياتهم هتتقسم بين أب وأم كل واحد فى اتجاه.
لازمته أيه الفرح المتكلف ملايين وعمر ما حد هيخرج من الفرح راضي هيكون في انتقادات برضوا مفيش حاجه بتعجب حد مهما عملت.
الزفاف في الخارج، عدد المدعوين ممكن يكون ٣٠شخص يحضر منهم ١٠، الأطفال الجالسين ٢، الهدايا المقدمة بسيطة
لا مفقودات ولا إصابات، جلسة تصوير بسيطة لتخليد الحدث، عدد الصور الملتقطة للعروس :٢٠ صورة، مدة الرقص مش أكتر من ساعتين.
الزفاف في مصر عدد المدعوين ٤٠٠ مدعوا، عدد الحضور ٩٥٠ شخصا الأطفال السارحين بين الرجلين ١٢٠ طفلا وطفلة
الهدايا المقدمة ٦٠ علبة حلاوة، المفقودات تليفون، سلسلة، خاتم ذهب ، ٦ أطفال، الإصابات إلتواء كاحل القدم .. ظهور شجار في نهاية الزفاف عدد الصور الملتقطة للعروسين ٤٤٥٠ صورة مدة الرقص ١٠ ساعات.
تعليقات الحضور بعد الفرح هي كبيرة عليه، الأكل قليل، فستان العروسة ملوش علاقة بالأناقة، العروسة أطول من العريس، العريس أحلى من العروسة.. بلا نيلة كانت مالها بنت خالته.. أم العروسة مسيطرة… و.. و استفدنا أيه بقا من الفشخرة الكذابة غير سخرية الحضور؟!.
البساطة سر الحياة والحب سر الحياة الزوجية الناجحة.
اقرأ أيضا للكاتبة:
