ميرفت قاسم تكتب « بالعربى الكسيح »: أخلاقيات الدخول في علاقات جديدة
لازم تكون عارف و فاهم كويس إن دي علاقة و معرفة جديدة يعني لا يجوز إطلاقا أنك تفرص عليه أحزانك و لا تجاربك اللي فشلت فيها قبل ما يدخل حياتك.
ممكن دا يحصل بعد فترة من معرفتكم ببعض يعني قدام شوية لما تتطور العلاقة بينكم و الصداقه تتعمق ودا هيحصل بشكل تدريجي وطبيعي.
مش من المستحب أنك تفرض على شخص جديد فى حياتك لسه متعرف عليه من كام يوم، كل الدراما اللي حصلت لك ومفيش بينكم أي ذكريات أو معرفة سابقة، ومش مستحب أنه ياخد فكرة عنك أنك انسان غاوي دراما.
الانطباعات الأولي تدوم خلي فكرة الناس عنك أنك شخص خفيف الظل مرح مقبل على الحياة.. فيه ملايين الأشياء اللي ممكن تتكلموا فيها في البدايات غير التجارب الفاشلة والمحزنة اللي مرت بك فى حياتك.
من أخلاقيات التعارف أنك تعرف اللي قدامك تفهمه تسأله عن نفسه مش كل التركيز يكون عليك دا خطأ كبير حاول تجنبه.
لازم تعرف اللي قدامك دا هو مين شغله ايه أحلامه طموحاته بيفكر ازاى فى مستقبله. متوصلش اللي قدامك لدرجة من الإحساس بالملل تدفعه يكلمك بتهكم ويقولك سبني اعرفك بنفسي بقا يا اخي حاول تشاركه تفاصيله.
من أخلاقيات التعارف الوصول بدرى عن ميعادك، ودا دليل اهتمام وحرص على توثيق المعرفة و لو حصل تأخير بتتصل تعتذر وممكن مع الاعتذار تقدم هدية بسيطة شوكولاتة وردة أي حاجة تقول بيها أنك آسف و إن التأخير كان خارج عن ارادتك.
..خليك فاكر الانطباعات الأولي بتدوم حاول ترك انطباع حلو عنك وعن أخلاقك من أول لقاء.
أيضا من أخلاقيات التعارف عدم الخوض فى أحاديث عن أشخاص تعرفهم مع إنسان أول مرة تقابله، لأن ده هيترك عنده انطباع مش حلو عن أخلاقك.
لازم كمان يكون فيه ذوق فى التعامل مينفعش حد يكلمك وأنت ماسك تلفونك عيب جدا أنك تمسك تليفونك و حد بيتكلم.
حاول يكون المزاح بينكم فى حدود المقبول بلاش اليد تمتد، راعى طريقة كلامك، وألفاظك مش كل الناس ممكن تقبل طريقتك فى الهزار.
الأخلاق نبت’ جذورها فى السماء أما أوراقها وأزهارها فتعطر الأرض.
