فيديو.. اعتزال سمسم شهاب يتصدر التريند وجدل بعد وصفه بـ ” الحرام”
كتبت – صفاء حمدي:
تصدر الفنان سمسم شهاب محركات تريند جوجل بعد انباء تفيد باعتزاله الغناء ووصفه للفن بالحرام، وعلى الفور ظهر سمسم في فيديو لايف عبر صفحته الرسمية على “فيسبوك”، لكشف الحقيقة.
اقرا أيضًا.. إصابة زوجة سمسم شهاب بالسرطان ودخول شقيقه العناية المركزة
وقال سمسم شهاب: “فيه صحفي سألني بيقولي الفن وإلى آخره قلتله مش راضي عن الوضع اللي حاصل، قالي وبتهاجم بتوع المهرجانات ومش حابب الفن ده وبتدعو للفن الكويس، قلتله آه طبعا”.
واستكمل: قالي ما أنت بتغني في ملاهي ليلية، قولتله أنا مجبر إن شاء الله أحاول أبعد، فقالي ده حرام قلتله لو هنتكلم عن الحلال والحرام، ففيه كتير من الأئمة حرموا الغناء ف ادعيلي ربنا ياخد بأيدي وابعد خالص وده المشروع المستقبلي اللي بفكر فيه”.
اعتزال سمسم شهاب
واضاف :”سألني يعني أنت هتعتزل ؟ فقولت ده موضوعي اللي جاي عايز بس أقف على أرض صلبة عشان مبقاش حرقت نفسي، وخسرت ربنا ونفسي وخسرت حاجات كتير جدا، قمت لاقيت مواقع كتيرة وكبيرة بتكتب إني بعتزل الفن نهائيا، بس الحقيقة انا مقولتش كدة، ده قرار ناوي أخده في المستقبل، خلال فترة مش كبيرة”.
وتابع: “فيه حاجة في دماغي عايز أعملها عشان لما ابعد أكون واقف على أرض صلبة عشان مرجعش تاني .. انتوا شايفين ظروف الحياة صعبة على الكل.. حبيت أوضح إن الكلام ده كلام مش صحيح وخبر غير صحيح، وخبر مش صحيح”.
واضاف: “للأسف زعلان من الصحفي جدا، مش عارف ليه عمل كده الله أعلم، وواخد على خاطري جدا منه، مكنتش منتظر كدة أنا بحترم الصحفيين جداً وبتعامل بكل احترام وهذا ما يستحقونه والمفروض ده يحصل، لكن المفروض التصريحات متتحرفش، عشان كدة قولت اتكلم واوضح اللي حصل”.
اعتزال سمسم شهاب
https://www.facebook.com/semsem.shehab8/videos/477815200988186
