إسلام كمال يكتب: فاصل صيامى .. مقال بالعامية عن الدراما المصرية
في حوالى أربع فرق أمدت شريان الكوميديا والدراما بالفنانين والمؤلفين المصريين خلال السنين اللى فاتت، على اختلاف مستوياتهم، فرقة مسريحة قهوة سادة، ومن بعدهم بفترة مسرح مصر، وساتار داى نايت بالعربي وفرقة أحمد أمين ومجموعة أكرم حسنى وفريق باسم يوسف!
عند كل مجموعة منهم ناس مستواها هايل وناس متوسطة وناس على أدها جدا!
المجموعة الأشهر للجميع، بسبب العدد والانتشار، فرقة أشرف عبد الباقي، وهم الأقرب حفظا في الأسامى كمان، زى مصطفي خاطر وتوتا واوس اوس وانور ووزيو وإسراء وربيع وحمدى وبسيط وسارة وإبرام وبيشوى ومتولى، إحنا كدا قلنا كلهم تقريبا!
لكن بردو في ناس هايلة في المجموعات التانية، ورغم أنهم الأحدث، لكن مجموعة أمين عاملة شغل في السوق ومسيطرة، خاصة بعدما خدهم مكى، زى ما كان بردو السبب في شهرة نجوم مسرح مصر وهما صغيرين، بس للأسف مش فاكرين منهم بالاسامى إلا مثلا الهايل محمد طعيمة ونفادى. ومربوحة رغم إن بنات طلعوا مع أمين وكانوا أحلى من مربوحة، بس أرزاق بقي، وطبعا ما ينفعش ننسي الست عارفة ولا طه اللى مكسرين الدنيا.
وفي مجموعة كويسة من ساتار داى نايت بالعربي، لاقيت مساحة كبيرة في الڤيديو والسينما منها محمود الليثي وإسلام إبراهيم وكمان بطلة ست كوم اللعبة وكدا كدا نور قدرى كانت مشهورة من قبل الفرقة والبنت السمرا وسلطان، أسف لعدم تذكر بعض الأسامى، صيام بقي 😉
والغريب إن خالد منصور وفادى ألفونس، رغم شهرتهم من أيام برنامج باسم يوسف، إلا إنهم ما نالوش حظ صحابهم، اللى بدأوا بعدهم، أرزاق بقي، بس المؤلف أيمن وتار اللى كان ثالثهم مع باسم، دايس جامد في سوق الكتابة، رغم إن أغلب حواديته مضروبة من برا، بس تمصيره حلو بردو، لكن لازم يقول يعنى، مش يكتب لى تأليف، وده ما يمنعش إن مسلسل الوصية بتاعه كان هايل منه، وكنا عايزين منه جزء تانى.
وبمناسبة مسلسل الوصية، كان في ولد مساعد لإبن عم إيبو، مرتضي، ده من فريق أكرم وكمان ولد تانى كان في حلقة الكول سنتر بخلاف البنت اللى بقيت تعمل إعلانات، دول التلاتة الوحيدين اللى طلعوا من فريق أكرم ، وكمان مش مشهورين، وده طبعا يحسب عليه، لأنه مش بيهتم إلا بنفسه.
المفارقة بقي أن فريق “تياترو مصر التانى” اللى كملته شركة ڤيردى، بعدما أشرف عبد الباقي سابهم وراح بالاصلى الإم بي سي، وبالمناسبة أنا عملت مع ڤيردى برنامجنا ” فؤش في المعسكر” .. رغم مستوى تياترو مصر التانى إلا إنه في ولدين وبنت منهم مكلمين ، منهم واحد واخد دور في ألف حمد لله عالسلامة، والتانية موجودة في ست كوم الروبوتس بتاع شيماء سيف وعمرو وهبة، واللى اتنجم فيها أكتر واكتر طه خريج فريق أمين.
عموما، أنا لاقيت نفسى كنت محتاج أفصل شوية عن الشغل والسياسة والتحليل والأجواء المقلقة وكدا يعنى، قلت أكتب شوية في حاجة تانية، وهدفي هو الدعوة باستمرار لنعمل فرق تمثيل بكل أركانها ممثلين وكتابة واخراج وانتاج وديكور ومونتاج وتصوير ولبس، زى دول من خلال برامج ومسلسلات، وبالمناسبة أنا واخويا عمرو كان عندنا تجربة مع قناة القاهرة والناس في السكة دى، وطلعنا نجوم منها من حوالى عشر سنين، ومنهم كملوا ومنهم اتعطلوا بردو، أشهرهم أحمد مجدى والولد اللى كان بيقلد السادات وكان هنيدى بيحبه أوى…..أنا ضعت في الأسامى خلاص.
وقبل ما ننهى كلامنا، عايز أقول أن المنصات على كل سلبياتها عاملة شغل وبتفتح طريق للناس ، وأخرهم قنبلة البالطو وكمان كان في إسعاف يونس، وهما طالعين الأيام دى في شغل الرعب، رغم ان الكوميديا الهادفة أفضل، والغريب إن اليوتيوب والسوشيال ميديا تراجعت في ضخ المواهب وده بسبب أعتقد إن المحتوى تراجع بشكل بشع، ومفيش الا الدحيح مثلا اللى فيه بعض الرجا، إنما غير كدا كله ضايع للأسف، وده مؤشر فاضح لحال المجتمع.
ولازم نشكر اللى عارف يشتغل ويبدع في الأجواء دى، لأنه للأسف الاحتكار في سوق المسلسلات وكمان الإعلانات قافل الدنيا على كام اسم بس، كفاية مثلا إن إعلانات سعدى وجوهر وتامر مرسي بتقطع مسلسلات سعدى وجوهر وتامر مرسي، في مشهد من الكوميديا السودا بصراحة!
