ميرفت قاسم تكتب « بالعربى الكسيح »: سندوتش كبدة بالشطة ولا سؤال الباركود
بيان
كنت زهقانة من الحر ومش قادرة اقف فى المطبخ من الحر والرطوبة، فكرت ادلع نفسي بما أني لسه قابضة قلت بقا أعيش سني وأغني وأحب الحياة.. عن ما حد حوش.
دخلت أوتيل بشاور للجرسون فى المطعم عايزة أعرف عندهم أيه فى المنيو بتاعهم.. في حاجة مميزة ولاّ لأ ؟!.. يقوم أيه يناولني بتاعة صغيرة كده بلاستيك باركود ويقولي اختارى اللي يعجبك.. اختار ازاى يا بني؟!.. قالي حوارات معرفتش منها حاجة وأنا أساسا طهقانة من الحر قال ايه البتاعة ده امسكها قدام كاميرا الموبيل وأدوس على اللوجو فتعرض عليا المنيو واختار منه وكمان ايه مكتوب اسم الأكلة وبس.. أي نعم كاتب الوصف بس من غير صور يا مؤمن دا الصور نص المشاهدة وربنا الصورة بتشبع تقوم تحرمني من الصورة كمان وتكتب الوصف وخلاص ناقص تقولي عدد السعرات الحرارية الموجودة فى الأكل عشان تصد نفسي كمان.
زمان كنت أدخل المكان من دول قبل ما أقول عندكم إيه النهارده مميز في المنيو بكون شبعت.. ليه بقا السلاطات وفواتح الشهية والعيش بينزلوا قبل ما تنطق.. تصبيرة كده زى اللي كلنا متعودين عليها في بيوتنا واحنا راجعين من المدرسة وقبل ما نغير هدومنا.. ماما في أكل أيه جعان أوى.. تقوم تعملك تصبيرة أى سندوتش.
المطعم بقا بالنظام القديم كان بيعملوا تصبيرة لحد ما ينزلوا الأكل ، طب يا سيدي أنا ست تقليدية مبحبش البدع أنا جعانة وعايزة آكل على طريقة يا سحلوب يا دحلوب هات المطلوب ، واحد فرخة مشوية قبل ما أكمل كلامي يكون الأكل حاضر إنما اقولك جعانة يا مؤمن طالع عيني من الحر يا سيد زهقانة يا حاج خلّص.. عصافير بطني زقزقت.. قولي أنت الموجود عندكم أيه يقولي دا النظام يا فندم.. قلت له: يا بني اعتبر موبيلي فصل شحن زى ما صاحبته هتفصل شحن من الجوع.. بكلم مين ، ولا هو هنا.
خرجت من المطعم متغاظة وقلت أقعد فى بيتي وآكل براحتي، وأنا في الطريق لفت نظري عربية بتاعة كبدة وأنا خلاص فصلت شحن ، نزلت يا مؤمن ضربت ست سندوتشات كبدة اسكندراني بالشطة والليمون آخر حاجة من اللي تاكلها من هنا وتعرف نتيجتها بعدها بساعة من الشطة.. مفهوم بقا هيحصل أيه لكن مهما حصل هيكون أحسن من المطعم أبو بلاستيك دا اللي هياكلني
الله يرحم زمان أيام ما كانت البيوت فيها ريحة الخير ، تدخل البيت من دول تقابلك روايح صينية بطاطس فى الفرن .. تشم طشة الملوخية وأنت على باب الشقة.. وريحة الرز المفلفل اللي لو فكرت الوقت تقول لبنت من بنات اليومين دول نفسي آكل رز مفلفل تقولك مش بحب الرز سبايسي ولو عملت فيها شاطرة تحضرلك كاتشب حار وتقولك رز اسبايسي.
