أمير منير يخرج عن صمته ويرد على انتقادات “عمرة البدل”
كتب – علي سيد
خرج الداعية أمير منير، عن صمته للرد على الهجوم الذي تعرض له خلال الساعات الماضية، عبر مواقع التواصل الاجتماعي، عقب إعلانه عن عمرة البدل، وذلك عن طريق تطبيق يسمى تطبيق عمرة البدل نظير مبلغ 4000 جنيه.
اقرأ أيضا.. أسما شريف منير ترد على جدل حلاقة شعرها: قرار انفعالي ومش ندمانة
وقال أمير منير عبر حسابه على موقع التواصل الاجتماعي فيس بوك: تعرف إن لو الموضوع فلوس كنت عملت ملايين النهارده بس من قبول اللقاءات التليفزيونية والمواقع والجرائد ونقلت في فيلا النهارده، وبشكرك على الترند وأنا هناك، مضيفا: تعرف إن لو الموضوع فلوس كنت فتحت إعلانات يوتيوب وفيسبوك اللي أنا قافلها جابتلي آلاف الدولارات من المشاهدات بس من غير ما أوجع دماغي، بس كان ومازال رأيي إنها حرام مع كامل احترامي وتقديري لعلمائنا اللي شايفين مفيهاش مشكلة.
وتابع: طب ما اللي هيعملها كده هيعملها للفلوس مش لله يبقى مش هتوصل للي وكله بيها؟، ليه الدخول في نوايا البشر وكأن الكل شياطين؟، ولكن هفترض معاك ده طالما أحرم بالعمرة عن الشخص اللي وكله بيها وقام بها على وجهها يصل ثواب الفعل إلى من وكله، ثواب من قام بالفعل نفسه، اللي أنت وكلته، هو اللي هيتأثر بنيته فلو كانت نيته لله حاز الأجر أما لو كانت نيته غير ذلك فليس له شيء، يعني اللي وكل حد بالعمرة عن ميت أو مريض او متوفى، الثواب يصله بغض النظر عن صدق نية اللي وكله بيها، مؤدي العمرة، ولكن زي ما قولنا نجتهد في اختيار الصالحين اللي عندهم علم.
وأضاف: أيوه أنت بتدافع عن الأبلكيشن بتاعك عشان بتكسب منه؟، من العجب إن الناس اتهمت بغير دليل، والله الأبلكيشن لا بتاعي ولا باخد منه نسبة ولا لي علاقة أكثر من أني لقيته يسهل على المسلمين شيء من أمر دينهم فحبيت أوصله ليكم.
وأوضح: طب مفيش بقى عمرة بالميتافيرس ولا على زووم؟، لا يجوز والله ولو حد قادر يبقى عليه يقوم بالعبادة على وجهها بنفسه لإنه لا متوفى ولا عاجز ولا مريض لا يرجى برؤه، مردفا: طب ومفيش أبلكيشن علينا يصلي ويصوم عني؟، فيه عبادات الفقهاء أجازوا فيها الإنابة زي الأضحية زي الزكاة زي العمرة والحج وغيرها مما أجازه الفقهاء، وفيه عبادات لا يجوز فيها الإنابة زي الصلاة والصوم (عارف إن السؤال سف لكن قولت نستفيد).
وردا على ارتفاع سعر الأبليكشين عما أعلن عنه، قال أمير منير: ما أنا قولت في الكومنت اللي اتريقتوا عليه الله يسامحكم، غيروا السعر للمصري في الإعدادات عشان تشوفوا أسعار مصر، ليه بقى؟ لأني لما جربت الخدمة وحسيت فيها خير للناس لقيت أسعارها بالريال كبيرة علينا فكلمت الناس إنهم لو هينزلوا الخدمة لمصر لازم ينزلوها أرخص واستجابوا بالفعل وعملوا الخدمة لمصر بسعر أرخص وقالوا لي -وأنا افتكرت إنها حاجة هتفرح الناس برضه- هنعمل لك خصم بكود مخصوص يخليها ارخص كمان، فوصل الموضوع إنه بقى بـ3600 تقريبا يعني 360 ريال واللي في السعودية عارف إن المبلغ ده بعد مصاريف العمرة والتوزيع بين الأبلكيشن لإنه المنظم للأمر وبين مقدم الخدمة مش مبلغ كبير هناك.
