الفنان حمادة صميدة: “أنا قاعد في البيت مقهور على نفسي مش لاقي شغل وأب لولدين”
نشر الفنان حمادة صميدة بوست عبر صفحته الشخصية على موقع التواصل الاجتماعي، يطالب فيها زملائه الفنانين والمنتجين والمخرجين بتوفير فرصة عمل له في أي مسلسل أو فيلم .
وقال “وحشتني الكاميرا ووحشني صحابي في الشغل أنا اشتغلت أعمال كتير مع نجوم كبار ومخرجين كبار وأمنوا بيا وبشغلي ودايما كانوا بيقولولي انت شاطر وعمري ماطلعلي صوت في لوكيشن ودايما في حالي يمكن أنا عفوي وعلي نيتي شويه”.
وتابع: “أنا والله معنديش شغل تاني وشغلنتي وبتجري في دمي الفن أنا بطلب من أستاذاتي وزملائي أنا قاعد في البيت مقهور ونفسي اشتغل معاكم زي الاول أنا شايل مسؤوليه بيت وأب لولدين وكل يوم اطلع وابص في وشهم ومقهور وخايف وتجاعيد وشي بانت من الزعل أرجو منكم اني لو حصل مني شئً زعل حد مني أنا آسف أنا والله عفوي وعلي نيتي رغم اني عارف اني عمري مأذيت حد ولا زعلت حد مني”.
واستكمل “أنا بشتغل الشغلانه دي من ايام مسلسل سوق الخضار ومسلسل القاهره 2000 وفيلم بوبوس وفيلم عصابه الدكتور عمر وفيلم واحد صفر وفيلم عائله ميكي وناس كتير شغاله مجاميع تشهد اني جيبها من تحت الصفر وكنت بطلع مجاميع”.
