فيديو: زينة تكشف تفاصيل تعرض نجليها لهجوم كلب في كومباوند وتطالب بحق ولديها
كتبت: هدى الفقى
كشفت الفنانة زينة عن تعرض نجليها لهجوم من كلب ضخم كان برفقة صبي يبلغ من العمر 11 عامًا، وذلك أثناء لعبهما في ملعب كرة قدم داخل الكومباوند السكني الذي يقيمان فيه.
وفي مداخلة هاتفية مع برنامج “الحكاية” مع الإعلامي عمرو أديب على قناة MBC مصر، روت زينة الواقعة قائلة:
“أول امبارح ولادي نزلوا يلعبوا كورة في ملعب خاص بالكومباوند، وأنا رُحت سوبر ماركت قريب، وفجأة ابني كلمني بيعيط وبيقول: واحد سيب الكلب علينا وأنا اتعورت.”
وأضافت: “ولد جه قال لولادي اطلعوا من الملعب عشان هيلعب هو وقرايبه، ولما ابني رفض قال له: أنا هعرف أخرجك، وساب الكلب يهجم عليهم. واحد من ولادي نط من فوق الحديد واتخدش جامد في دراعه، والتاني الكلب خربشه في رجله وجرى وراه.”
زينة أوضحت أنها ذهبت إلى منزل الطفل المرافق للكلب لتقديم شكوى لأسرته، لكنها فوجئت برد فعل والدته قائلة: “رحت مع مشرف الأمن، ولقيت الست بتشتم وبتتهجم عليا.”
وتابعت: “بلغت النجدة وجات عربيات ورئيس مباحث، والداخلية متأخرتش، لأن وجود كلب بالحجم ده من غير رقابة يمثل خطر كبير.”
كما كشفت الفنانة عن تطور غريب في الأمر: “اتفاجئت إن أهل الولد اتهموني إني كنت بجري بالعربية علشان أدوس عليه، وأنا في الحقيقة كنت بجري علشان ألحق فرد الأمن وأعرف مين الولد.”
وأكدت زينة أنها اتخذت الإجراءات القانونية اللازمة: “عملت محضر رسمي، وخدت الولاد على مستشفى الشيخ زايد، وعملت كشف طبي وتحويل رسمي.”
واختتمت بتوجيه رسالة شديدة اللهجة: “إزاي طفل عنده 11 سنة يتمشى بكلب متوحش من غير كمامة ولا ترخيص؟ هل لازم تحصل كارثة؟ ولادي عندهم امتحانات ومراحوش المدرسة، ومش عارفة أنيمهم من يومها بسبب اللي حصل… أنا عايزة حقهم.”
