المعتزلة حلا شيحة تُطلق قناة للحديث عن تجربتها الروحية وتأثرها بالقرآن | شاهد
كتبت: هدى الفقى
أعلنت الفنانة المعتزلة حلا شيحة عن تدشين قناة جديدة على موقع YouTube، مخصصة للحديث عن حبها لله، وتأثرها العميق بالدين الإسلامي، والقرآن الكريم، في خطوة تُعبر عن تحول روحاني تعيشه وتود مشاركته مع جمهورها من خلال تجربة شخصية لا تنطلق من موقع الدعوة بقدر ما تنبع من صدق المشاعر والرحلة الذاتية.
وفي أول فيديو نشرته عبر القناة، قالت حلا:
“سعيدة جدًا وأنا بتكلم عن ربنا، وسعيدة إن في ناس بعتت لي وقالت لي إنها بتحب طريقتي وكلامي وبتطلب مني أتكلم أكتر… حسيت إن دي أكتر حاجة بحبها فعلًا، وأكتر حاجة شاغلة قلبي وفكري وروحي: حب ربنا والتأمل في آياته.”
وأضافت:
“فكرت ليه ما أبدأش أول فيديو بالكلام عن القرآن الكريم؟ عن سر ارتباطي بيه، وازاي كان سبب في هدايتي وتغييري، حتى في الفترات اللي ابتعدت فيها عن ربنا، كانت في آيات جوايا لسه بتكمل.”
وتحدثت شيحة بشفافية عن رحلتها قائلة:
“مفيش حد يحس بحقيقة معينة تهزّه من جواه ويقدر يبعد عنها بسهولة، حتى لو ابتعد، بيبقى عايز يرجع تاني. أنا بتكلم عن القرآن من منطلق تجربة، مش من باب التفسير والدعوة، لكن من باب إن دي رحلتي أنا، وهشارك الآيات اللي غيرت فيا وخليتني أوصل للمكان اللي أنا فيه النهاردة.”
كما تطرقت إلى الرسائل التي تتلقاها من المتابعين:
“ناس كتير بتبعت لي وتقولي: ‘إزاي قوية كده؟ وإزاي قدرتي تتجاوزي اللي عديتي بيه؟’. والرد بسيط، مفيش حاجة صعبة، وربنا هو اللي بيهدينا، وكل حاجة نطلبها من ربنا نثق إنه قادر على تحقيقها.. بس لازم نحسن الظن فيه، مهما كانت حالتنا.”
وكتبت حلا في وصف القناة:
“ديننا بهجة وحياة أجمل، وروح أطيب، وقلب أنقى، وسعادة مختلفة، وشوق لما هو أعلى وأغلى.. حنتكلم من القلب.”
يُذكر أن حلا شيحة كانت قد أعلنت مؤخرًا عودتها للحجاب، ونشرت عبر حسابها الشخصي على تطبيق Instagram صورة جديدة لها ومقاطع فيديو، في خطوة أثارت تفاعلًا واسعًا بين متابعيها، الذين رحبوا بخطوتها الجديدة وشجعوها على الاستمرار في هذا المسار الروحي والوجداني.
