ميرفت قاسم تكتب « بالعربى الكسيح »: مجموع محمد صلاح فى الثانوية العامة
موسم السخرية من مجاميع الثانويه العامه بدأ وخد عندك:
“شوف الدكتور اللي جاب ٩٩ موت العيان وصاحبة اللي جاب ٦٠ خرجه براءة”.
تنسيق الثانويه العامه المجموع العالي عمره ما كان مقياس للنجاح، أو الفشل ، العبرة بالنجاح في أى مجال هتحبه.
أنت مش واخد بالك أن مو صلاح (محمد صلاح) جاب مجموع صغير في الثانوية لكنه نجح بتفوق فى رياضة كرة القدم وحقق إنجازات وبطولات على مستوي العالم؟!.
طب تعرفوا أن المطربة ياسمين علي كانت مش بتحب المواد العلمية رغم أنها كانت مفهمه أهلها أنها علمي وهى بتحب الدراسة النظرية المتوفرة في القسم الأدبي، وبالفعل دخلت أدبي، والتحقت بالمجال اللي بتحبه وكان كل همها أنها تكون أحسن مغنية.
لاكانت عايزة تكون دكتورة ولا مهندسة كان حلمها تكون مطربة وحصل فعلا وأصبحت أفضل مطربة سنة 2018
خالد أنور دخل فنون مسرحية ولأنه بيحب التمثيل ، ودى الحاجة اللي حبها، ولقي نفسه فيها ، ولما دخل ثانوية عامة جاب 65٪ ودلوقتي بقي ممثل في مسرحيات وأدوار كتير وناجحة جدا.
أحمد حلمي رسب في الثانوية العامة 3 مرات تقريبا، وفي المرة الرابعة جاب 55٪ ، وحب التمثيل والكوميديا وبقي ملك الكوميديا،
عمر مكان خريجو كليات الهندسة، والطب، وسياسة واقتصاد، واعلام هم فقط محتكرو النجاح.. كل واحد قادر ينجح في اللي بيحبه وشايف نفسه فيه.
حاول تختار المجال اللي بتحبه وهتقدر تنجح فيه، وسيبك من مجموع ممكن يكون حصلت عليه بدون تعب وبالغش، وأياك يتملكك الغرور بمجموع عالي بالغش وتفكر تدخل كلية قمة تتعثر فيها، بعد كده اختار اللي هتنجح فيه واللي بتحبه.
