الركنة للجميع.. غرامة مالية ضخمة عقوبة وضع “كاوتش أو حجر” لحجز ركنة سيارة (فيديو)

استعرض الإعلامي محمد علي خير، خلال برنامجه “المصري أفندي” قرار التنمية المحلية بشأن توقيع عقوبة مالية ضخمة لكل من يضع “كاوتش” أو “حجر” أمام محله التجاري أو منزله لحجز ركنة سيارة.

وقال: “اللي كان بيحصل في إمبابة وفيصل والهرم وحواري إسكندرية الضيقة، أن كل واحد يحط حديدة ويقول ممنوع تركن عربيتك، مش هيحصل تاني، وزارة التنمية المحلية أوكلت للمحافظين، وكل محافظ كلف رؤساء الأحياء والوحدات المحلية أنهم يمشوا في الشوارع واللي يلاقوه حاطط فردة كاوتش في الشارع عشان يحجز مكان رصيف أو كتلة أسمنتيه يوقعوا عليه غرامة مالية ضخمة”.

وتابع: “جرب انك تمشي بعربيتك وتركن في ميدان المساحة في الدقي هيطلع ليك ألف واحد يقولك ممنوع يا بيه ده مكان أكل عيش متركنش هنا، ده مبقاش شارع ده بقي شوية بلطجية، أنت صاحب محل اشتريت المحل لكن مشترتش الرصيف اللي قدام المحل، ومش من حقك تمنع حد أنه يركن عربيته”.

وأشار إلى أن التنمية المحلية بدأت تطبيق قانون السايس بكل حزم وشدة، مضيفا “الشارع للجميع والركنة للجميع، أنت عاوز تاخد الحتة دي تروح لوزارة التنمية المحلية وترخصها ليك، لو انت صاحب محل أو عمارة المحليات هي اللي تحددلك وترسم ملامح الرصيف وتدفع الرسوم، أماكن الانتظار جاهزة كل اللي مطلوب منك ان تذهب إلى الحي التابع ليه لانهاء التراخيص”.

https://www.facebook.com/MehwartvChannel/videos/244033114271473/