ميرفت قاسم تكتب « بالعربى الكسيح »: الوصايا الأربعين فى توفير بنزين اتنين وتسعين
عندما شاهدت عمرو دياب بالملابس البيضاء فى حفل الساحل يتحدى الكورونا وارتفاع الأسعار وخاصة أسعار الغذاء والمحروقات، تذكرت مسرحية الراحل سمير غانم، “أخويا هايص وأنا لايص” ودا حدث بالفعل فى الأيام الماضية.
تذاكر حفلة الهضبة لأصحاب الدخل المرتفع وليس لمحدودي الدخل المواطن المصري البسيط ما يشغل باله فى تلك الأيام هو توفير مستلزمات البيت الضرورية، ومحاولة التغلب على ارتفاع أسعار الخدمات بنزين يعني زيادة فى تسعيرة الركوب ميكروباص تاكسي اتوبيس ارتفاع أسعار الخدمات وقبلها السلع الغذائية وأولها الزيوت خاصة زيت الذرة وبعدها الدواجن ثم اللحوم والأرز.
ومطلوب منك كمواطن بسيط تلف حوالين نفسك عشان تقدر تاكل فى حدود المعقول وتلبس عادى وتدفع أجرة مواصلات وتدفع خدمات ميه كهربه غاز ولو فكرت تتعب توفر فلوس الدكتور وتعمل لنفسك وصفة طبيعية لعلاج آلام الظهر والرقبة واليدين والأنف والحنجرة.
كل دا عشان توفر وتدفع خدمات (!!) طيب يا سيدى هو البنزين اللي سعره ارتفع دا ليه مش مخصص لصاحب السيارات الفارهة زى الشيخ طه ما كان بيقول فى مسلسل المال والبنون يا صاحب السيارة الفارهة ليه بنزين السيارات البسيطة اللي الناس بتاكل منها عيش ميكروباص تاكسي واتوبيس استعمالات المواطن البسيط ليه الزيادة فى بنزين النوع دا
ارفع أسعار المحروقات للناس إللي كل سنة بتغير عربية لبتوع حفلات الساحل ذوى الملابس البيضاء.
الغريب هو أن كورونا مختفيه فى الصيف لكن فى حفلات الساحل فقط ومتواجدة فى الصيف للمواطن العادى
شوف أنا وأصدقائي عملنا أيه عشان نتغلب على ارتفاع أسعار البنزين.. اتبعنا النصايح المهمة التالية التى تبادلها نشطاء “السوشيال” تحت عنوان: “إزاي توفر البنزين” ومفيش مانع نقول فيها ونزيد:
1- متشغلش التكييف.
2- انسى الفرك والتخميس .
3- ممنوع تحرق على الغيار.
4- بطل العربية و انت نازل تشترى حاجة حتى لو 20 ثانية.
5- متشغلش التكييف.
6- بطل العربية فى الإشارات.
7- متسافرش بالعربية بعد كده.
8- لو معاك عربية اكتر من 1600 CC بيعها.
9- لو معاك عربية اكتر من 1200 CC بيعها برضه.
10- متشغلش التكييف.
11- ممنوع تركب اكتر من اتنين معاك فى العربية.
12- ممنوع تفتح اكتر من شباك و انت سايق.
13- لو السكة زحمة اركن على جنب لغاية ما تسلك.
14- خلى معاك حبل فى العربية عشان حتحتاجة كتير.
15- متشغلش التكييف.
16- لو فى اكتر من عربية فى الأسرة انصحك بالاستغناء عن واحدة إن لم يكن كلهم.
17- شغل التيربو و الديفيل و فلتر هواء الرياضى ده تنزل تشيله و تولع فيه وقتى.
18- حاول تسترزق فى السكة خدلك واحد من الطريق و خد اللى فيه النصيب.
19- الشد مع عربيات فى السكة دى بقت اسمها فقرة الذكريات.
20- ابوس ايدك متشغلش التكييف.
21- اللى معاه جيب أو عربية دفع رباعى ده راجل يستحق الصدقة دلوقتى متنساهوش عشان ربنا يفتكرك.
22- عصر الشهامة و انزل اوصلك يا حاج انتهى ياريت تراجع نفسك تانى قبل ما تتشاهم.
23- لو ابوك قالك انزل وصل اختك او انزل هاتلى حاجة اعمل نفسك ميت.
24- القيادة فوق 100 كم/ساعة إسراف و تبذير ربنا حيحاسبك عليه.
25- متشغلش أم التكييف نهائياً .
26- اللى معاه عربية دلوقتى يستحق أى حسنة.. عامله كأنه فقير.
27- المشوار اللى اكتر من 20 دقيقة قيادة متروحش بالعربية.
28- لو ساكن بعيد عن شغلك يا تسيب شغلك يا تعزل أوفر لك صدقنى.
29- اى حاجة بتزود فى حرق البنزين صلحها من دلوقتى احسنلك.
30- ألغى التكييف من العربية أحسن.
31- اتعلم تسوق موتوسيكل أو عجلة حتحتاجهم قريب.
32- لو عربيتك قديمة شوية استعمل بنزين 80
33- ادعى ربنا فى صلاتك ان السكة متكونش واقفة و انت بالعربية.
34- حاول تصاحب سواق ميكروباص و انسى ستايلك دلوقتى.
35- متشغلش التكييف عشان خاطر أولادك.
36- الاحتياطى فى التانك اهم من رصيد فى البنك.
37- تسخين العربية ميزدش عن 30 ثانية كحد اقصى.
38- بدل ما تروح لواحد صاحبك بعلبة شيكولاتة خدلك جركن بنزين أحسن.
39- متفولش العربية عشان العداد حيغريك انك تمشى اكتر حط 10 لتر بس.
40- متشغلش التكييف حيتخرب بيتك..
ملحوظة : بﻻش تشغل التكييف أحسن لك و الأفضل متشغلش التكييف.
اوعى تنسى وأيدك تيجى على التكييف بالغلط ويشتغل منك لا قدر الله.. ولو حصل اركن فوراً و اغسل وشك واستغفر ربنا وإن شاء الله مش هتتكرر تانى …
والله شكلك كده هتنسى وتشغل التكييف
ناقص الست أمينة تيجي تعلمنا اتيكيت تفويل العربية يمكن يوفر معانا شوية
أنا عن نفسي بعد كده من باب الفشخرة هبقى أعمل Share location وأنا فى البنزينه..
