عاطل وببيع أكل ومشروبات في الشارع.. عمرو يسري ينهار على الهواء
كشف الفنان عمرو يسري، عن تفاصيل مؤلمة في حياته الشخصية والفنية، وأسباب ابتعاده عن مهنة التمثيل، خلال استضافته في أحد البرامج الشهيرة.
وقال يسري وهو في نوبة بكاء على الهواء: “سنة 2005 كنت بجهز أكل لوالدى عند خالتى، ولما رجعت لقيت البيت مولع وبابا متوفى بسبب الحريق، والدي كان قعيد ومش بيتحرك وأنا اللي كنت بتولى رعايته”.
وبعد ابتعاده عن التمثيل كشف عن مهنته الحالية، قائلا: “بصنع الطعام فى المنزل وببيعه في الشارع، إضافة إلى المشروبات الساخنة، لان اختيار الفنانين فى الأعمال حاليا غير عادل ولا يعتمد على الموهبة “.
وأضاف “يسري”: “بتألم لما بلاقي الناس في الشارع يتصوروا معايا ويقولوا إنت فين؟ دي بتقتلني، النقطة إن فيه تغيرات، والطفرة اللي حصلت كانت بعد 2011، الـ 10 سنين اللي فاتوا دول غيروا حاجات كتير”.
وتابع:” نجوم كتير أوي بقوا في الظل، ومخرجين كتير نصهم رحمة الله عليهم أمثال حسين عمارة ورائد جديد، والنص التاني مبيشتغلش، وأصبح الموضوع في الجيل ده إنهم لازم يضربوا بالنار ويموتوا “.
وأكمل:” مش تقصير مني، والمسألة أصبحت شللية بحتة من الدرجة الأولى، وكل كرو بقى ليه الناس والمجموعة الخاصة بيه، سواء من منتج ومدير إنتاج ومخرج ونجم، وزمان المخرج كان بيبقى نمبر وان، ومن بعده الآخرين، دلوقتي المخرج بقى رقم 4، وتبقى طفرة لو المخرج حط اسم في العمل”.
وأضاف عمرو يسري، إنه ما زال لديه الشغف لتحقيق حلمه بالتمثيل، قائلًا: “على مدار سنيني دي كلها أنا معملتش حاجة، أنا لسة عندي شغف وعندي الطموح إن أعمل حاجة، يمكن فروق السن بتعلى ولكن بيقولولي إنت بيبي فيس ومبتكبرش، قُلت مش مشكلة المهم إني أرضي غروري الفني”.
واختتم عمرو يسري حديثه:” الفن في دمي، وعندي غيرة فنية وغيرة صحية، بس بيحصل مشاكل في الحياة تخلي الواحد ميكملش منها حريق بيتي ووالدي توفى فيها”.
