ميرفت قاسم تكتب «بالعربى الكسيح» : صباح/ مساء الهنا و السعادة
مساء أو صباح الهنا و السعادة (حسب وقت قراءتك للكلام الآتى):
– علي اللي اتسحر علي عربية فول.. أو اتسحر في PAUL.
– علي اللي اتسحر كشري أو اتسحر في EATERY.
– علي اللي اتسحر طعمية أو اتسحر في جاليريا.
– علي اللي اتسحر باذنجانأاو اتسحر في اركان
– علي اللي شرب قهوته كوفي مكس، أو اللي بيشربها في ستاربكس
صباح/ مساء الفل والياسمين عليكم كلكم يا اصحابي و حبايبي رمضان كريم.
قد يأتيك الفرح على هيئة شهر.. فكل سنة وانتم طيبين، ومبارك عليكم الشهر.
اللهم في رمضان هذا أعد للقلوب سكينتها، وأعد للحياة أُنسها، وللمساجد بركتها وللأماكن فرحتها
جاء رمضانّ لـ يضيء لنا شهرًا كاملًا، ممتلىء بالأجواء الإيمانيه والمطمئنه..
يارب إدخله علينا وأنت راضي عنا
جاء رمضان ليمحو ما قبله من أوجاع، ومشاكل، وغلاء معيشة، وحروب، وصراعات.
عيشوا روحانيات الشهر الكريم، اتجمعوا على مائدة الإفطار، زينوا البيوت، اختموا القرآن الكريم.
ابعدوا عن الموبايلات، والفيسبوك، عيشوا اللحظة بدون صورة، حسوا السعادة بقلوبكم مش بصورة وايموشن، تكتب في يشعر بالسعادة.
يا جدو خد حفيدك لصلاة التراويح.
حسوا ببركة صلاة الفجر، اتجمعوا بعد التراويح، وقوموا بزيارة تصلوا فيها رحمكم.
يا بنات ادخلوا المطبخ مع ماما، ساعدوها وسيبكم من الفيسبوك والانيستجرام والتصوير عيشوا رمضان مع الأسرة مش مع شاشة فصلتكم عن العالم.
رمضان شهر فى السنة، أوعوا تضيعوا بركة رمضان من صوم وتراويح وزكاة وصلة رحم وقرآن ولمة عيلة على الفطار والسحور عشان أى حاجة فى الدنيا.
.. رمضان كريم
