منة زهدي: تصدرت الترند صدفة و”يلا نهزر” على MBC وش الخير عليا (حوار)

كتب- إسلام فليفل

تصدرت التريند وحققت مشاهدات بالالاف بل تخطت المليون خلال فترة قصيرة، وأشاد المتابعين بمحتواها الصوتي (vo)، واستطاعت أن تثبت بجدارة مهاراتها في العمل الإعلامي كمذيعة سواء في برنامجها “يلا نهزر” المذاع على فضائية MBC مصر، أو برنامج “الحبكة” على قناة ETC، إنها الإعلامية منة زهدي.

اقرأ أيضا.. يلا نهزر مع منة زهدي.. رد فعل الأهالي بعد وصول سعر سلاكة الأذن والأسنان لـ٢٠٠٠ جنيه

حاور موقع “بيان” الإخباري منة زهدي، للحديث عن مشوارها في العمل الإعلامي وبدايتها وتجاربها المختلفة ولعل أبرزها قناة MBC.

وإلى نص الحوار:

في البداية كلمينا عن دراستك وحبك للإعلام ؟

أنا خريجة إعلام قسم إذاعة وتليفزيون جامعة مصر.
في الحقيقة بدأت شغل من أولى جامعة كانت البداية في شركة نهضة مصر للصحافة والإعلام، كنت بعمل استبيانات في مجالات ناشونال جيوغرافيك وميكي، وبعدها بدات اشتغل مراسلة تليفزيون في عدة قنوات.

حبي للإعلام كمذيعة من صغري، والحمد لله خلال فترة قصيرة قدرت اثبت نفسي واحقق مشاهدات كتيرة.

عرفينا على تجاربك في العمل الإعلامي وأبرز الأماكن اللي اشتغلتي فيها ؟

اشتغلت مراسلة تليفزيونية في عدة قنوات زي anb الاردنية، الحياة، dmc، فويس اوفر وايستنت برديوسر في برنامج البر والتقوى المذاع علي قناة المحور، مذيعة راديو اونلاين في رايو هوا التابع لحزب مستقبل وطن، وايضا fn، قدمت برنامج الحبكة علي قناة etc، اخيرا قدمت برنامج يلا نهزر علي قناة mbc مصر ومنصة شاهد، وكل تجربة اتعلمت منها وضافت ليا .

ازاي اكتشفتي موهبتك في الفويس اوفر ؟

أنا اكتشفت موهبتي في الفويس اوفر وقت تسجيلي التقارير التليفزيونية، ونمت الموهبة من خلال كورس إلقاء ولغة عربية، وعن طريق عملي سواء كان راديو اونلاين أو الفويس اوفر في شركات الانتاج.

كلمينا عن أبرز الصعوبات اللي قابلتيها في العمل الاعلامي ؟

الصعوبات اللي قابلتها في شغلي إن الفرصة كانت صعبة جدا، بالإضافة إلي ان العمل الإعلامي بيحتاج لعلاقات ومعارف وواسطة اكثر من الموهبة، بجانب إن الشغل الإعلامي في الاغلب بيكون في مدينة ٦ أكتوبر وده بياخد مني وقت ساعة ونص أو ساعتين عن مكان سكني .

شايفة ازاي دلوقتي السوق الإعلامي؟ وهل محتاج لضوابط ؟

للاسف السوق الإعلامي حاليا بيعتمد على التريند وعلى نسبة المتابعين للشخص حتي لو مش دارس إعلام، والتقييم حاليا علي أساس شهرة المذيع وعدد متابعينه حتي لو هيشتغل في المهنة دي لأول مره بجانب المعارف والعلاقات.

محتاج ضوابط طبعا، وان مش حد يطلع يقدم اي حاجه حتي لو كلام مايتسمعش لمجرد التريند، بالإضافة لمهارات المذيع والقاءه وهل هو متحدث جيد أم لا، لازم يكون في ضوابط تحكم المهنة، والفرصة تكون لاصحاب المواهب الحقيقة والدارسين اكتر ما تكون للممثلين والمشاهير.

‏تصدرتي التريند الأيام اللي فاتت بسبب الـ vo؟ كلمينا عن الموضوع ده ؟

بالنسبة لموضوع التريند اللي وصلته جيه بالصدفه، كنت عامله برنامج السنة اللي فاتت مقالب في الشارع اسمه يلا نهزر علي mbc مصر ومنصة شاهد وهو وش الخير عليا، وتم اذاعته السنة دي قبل رمضان للمره تانية، المقربين مني نصحوني اهتم بالسوشيال ميديا واتواجد عليها اكتر بجانب البرنامج، فبدأت اعمل فيديوهات فويس اوفر في شكل بسيط عن طريق اصوات معروفة للناس زي صوت خدمة العملاء والصوت المسجل في المترو، والحمد لله أول فيديو وتاني فيديو عدوا الـ٣ مليون مشاهدة، ومن هنا بدأت اكمل في طريق الفيديوهات والسوشيال ميديا.

رسالتك لخريجي كليات الإعلام ؟

رسالتي لخريجي الإعلام انهم ياخدوا كورسات لتطوير نفسهم، ويبدوا بالسوشيال ميديا؛ لانها منصة قوية ممكن تفتحلهم مجال للشغل الإعلامي بدون ما يحتاجوا لحد.