ميرفت قاسم تكتب « بالعربى الكسيح »: البنات ألطف الكائنات
بيان
أجمل ما في الخطوبة العزومات الرومانسية.. بينا بقا على أحلى محلات أكل في البلد، واللي عمرك مانتي شايفاها بعد الجواز ، صدقيني لو عملتي قرد ما هتشوفيها تاني المهم خدى مني النصيحة ده لكي عند أي عزومة مع ختيبك قلنا برقة أهه
الأول لازم تعرفي أن الشوكة والسكينة بيتمسكوا من إيديهم من الطرف، يعني مش م الوسط ولا من البوز زي الخنجر بتاع أبو لهب فى فيلم الشيماء ولا من فوق طبعااا ، زى فريد شوقي فى فيلم حميدو .
العيش أوعي تفضحينا وتقطعيه بسنانك ولا الرغيف نصين بأيدك، وكل نص لقمة ، ولا من حرف الرغيف كده وتروحي قطعه أو تاخدى وشه وتسيبي الضهر ، وتحشري أوعي.
العيش بيتقطع بالسكينة فى الطبق وبعدين تاخدي لقمة صغيرة وبعدها لقمة تانية براحة كده مش زلط ، عشان ميقولش عليكي مفجوعة قال يعني نفسك مسدودة، اضغطي على أعصابك شوية يا اوختشي وبعدين لما تروحي إبقي حفي وشغلي ودن القطة أو ودن الجاموسة حسب اللقمة اللي في ايدك وارمي فى البلاعة زي مانت عايزه ولا يهمك.
الشوربة أبوس الجدم وابدي الندم على غلطتي اني عزمتك برة يا ستي ابوس كعب رجل سيادتك شرب الشوربة ده مش ينقلب الطبق على بق واحد وبلشفط، لأ.. الشوربة تتشرب من غير صوت خالص، واوعي تنفخي فيها وتقعدى تلعبي بالبقاليل اللي في الطبق بلاش نفخ ، أحسن هتبقي عاملة زي القهوجي اللي بينفخ ف حجر الشيشة للزبون.
وطبعا عايزاكي تنسى تماما السلطانية اللي بتقلبيها على بقك ف البيت وتدلدقي علي روحك بالمعلقه والبيچاما تتبهدل وتحرقي نفسك، الشوربة تتشرب بدون صوت سخنة ولعة نار قايدة برضوا بدون صوت وعشان خاطرى والنبي تسيبي شوية فى الطبق عشان الملائكة.
ندخل على التقيل بقا:
الرز بيتاكل بالشوكة أوعي إيدك تتمد ع المعلقة وتغرفي من طبق الرز وتعبي ده مش فتة احنا مش في يوم الوقفة ولا ده صينية الرقاق أم رز بتاع العيد.
وانتي بتاكلي الرز كلي وكأنك بتبوسيه مش بتاكليه خليكي حنيينه.
المكرونة الاسباكتي برضوا بالشوكة تتلف على طرف الشوكة لحد ماتخلص، وبعدين تحطيها ف بؤك من سكات مش ترفعى الشوكة وتنزليهم زى الونش اللي شايل موبيليا وييدخلها من بلكونة شقة.. بلاش تشفطي المكرونة عود عود
السمك مشكلة شوفي بتفصلي اللحم عن الشوك إزاي تقطعي اللحم من النص بالطول وبعدين تفردي اللحم ع الجانبين ولما تخلصي ناحيةمتقلبيش السمكة هيقولوا فلاحة شيلي السلسلة بالشوكة والسكينة وحطيها ف جنب الطبق وكملي أكل النص التاني.
وبدل الفيلم الهندي ده نصيحة ماتكليش السمك خالص لأنك هتفضحينا لو أكلتي سمك وشوكة جت فى زورك هتلعني أم خطيبك اللي عينها فى الخروجة، والغدا هيقلب دراما قولي مابحبش السمك وخلصي، حتي لو قالك أطلب لك جمبرى إذا كنتي عارفاه أصلا أول ماطبق الجمبري ينزل بصيله بقرف، عشان يعرف أنك زهقانة من كتر أكل الجمبري الجامبو في بيتكم ، وأنك بنت عز وأكل وز وجمبري وأتنهدي جامد وقولي برضه وتروحي قاطعة راس الجمبرياية بالشوكة.
أنا ف عرضك يا اوختشي بلاش المصمصة دلوقت
البطاطس سواء مسلوقة أو محمرة أوعي تهرسيها وتدبيها ع الرز وتدي.. لأ لأ لأ.. بالشوكة حتة حتة وإنت زي ما تكوني هاتعيطي من كتر ما البطاطس صعبانة عليكي.
الفاكهة لو الفاكهة فيها بذر طلعيه من بؤك بالراحة وحطيه ف إيدك وهي مقفولة وبعدين ف طفاية السجاير اللي ع الترابيزه أوعي ياحبيبتي من نظام التفتفة للبذر ، انسي.
ولما تخلصي أكل تحطي إيدك على بطنك اللي عصافيرها بتصوصو من العينات اللي كلتيها وتقولي له مش ممكن أنا عمري ما اتفجعت كدة أنا أودامي أسبوع هابطل أكل فيه.
وبعدين تمسكي الفوطة اللي دايما موجودة ع التربيزة من غير لازمة وتبوسيها آل يعني بتمسحي بؤك
وبعدين تستأذني منه لدخول التوليت لإصلاح ماكياجك وتخشي التواليت وتطلعي من شنطة إيديك لفة الفول والطعمية اللي جايباها معاكي وبالهنا والشفااااااااااااا.
