ميرفت قاسم تكتب «بالعربى الكسيح»: كبرت وعرفت
زمان كانت جدتي تستعد لرمضان قبلها بفترة كبيرة.. كانت تدمس الفول فى البيت، والطعمية تتعمل فى البيت، والزبادى، حتي العيش بيتخبز فى البيت فى فرن البوتجاز.
سيبك بقا من باقي المأكولات من مربى، ومخللات، زيتون فلفل لمون.
سألتها ذات مرة: “ليه يا تيتة بتتعبي نفسك فى عمل كل دا ما تشترى جاهز وبلاش تعب؟!.. كان ردها بكرة تكبرى وتعرفي إن مفيش أحسن من اللقمة اللي بتعمليها بإيدك يا بنتي.
الطبيخ نَفَس، حلاوتك كلها بتظهرى فى عمايل ايديك فى المطبخ غير النظافة وحطى فوق كل دا بقا إنك تحسي بكونك ست بيت، وطبعا جدتى عندها حق.
بس يا ترى لو عزمت تيتة على سحور فى الماريوت وقلت لها إن السحور هنا بـ ١١ألف جنيه، هتقول إيه؟! ده ممكن تحجر عليا، هههه.
أصحابي خرجوا اتسحروا برة لو تعرفوا الفاتورة بتاع السحور كانت قد ايه؟ فلوس كتير والأكل عينات، وبيقولوا مش حلو كمان، وخد عندك الحساب:
9 فول اسكندراني بـ ٥٨٥ جنيه (ممكن تيتة تعمل بيهم فول عشر سنين ماعلينا)
١فول زبدة فلاحي ٦٥ جنيه
٣ قرص طعمية سادة بـ ٤٥ جنيه (أحنا بنقول سادة إمال لو كانت طعمية بالكاچو وعين الجمل وده بكام ده كمان؟!)
١١ أومليت رومي بسطرمة ٩٩٠ جنيه (خدوا بالكم دا بيض أورجنك من بتاع عمرو أديب)
9 بطاطس بـ ٤٠٥ جنيه (ليه كيلو البطاطس بكام.. دا أنا انزل سوق العبور اشترى بهم كام شوال بطاطس)
٨ طحينة بـ ٣٦٨ (ايه دا السمسم غلي أوى كده؟!)
٦ مياه معدنية ١٥٠ جنيه.
١٠ حاجة ساقعة ٣٠٠ جنيه.
٤ طعمية كبيرة ٢٦٠ جنيه (على أساس أنها بلغت سن الرشد).
الإجمالي ٤٢٤٣ .. آه نسيت و٦٨ قرشا، ومش عارفة دول وضعهم إيه الصراحة؟!. بالبقشسش نخش فى 4500 جنيه ده ثمن سحور يوم واحد ممكن جدا يكون مرتب شهر بحاله تعيش به أسرة فى شهر رمضان.
يا أخى يا صاحب فاتورة السحور أم 4500 جنيه لما الفاتورة ضايقتك أوى كده وعملت شير لها ونزلتها على مواقع التواصل الاجتماعي ليه ما عزمتش أصحابك دول واتسحرتوا فى بيت حد فيكم، أنضف، وأطعم، وأوفر، وأحسن، من الفشخرة الكذابة دى.
الله يرحمك يا تيتة، أنا كبرت وعرفت.
.. ورمضان كريم.
